واشنگٹن، 13 مارچ (یو این آئی)  سنیتا ولیمز اور بوچ ولمور کی خلاء سے واپسی تاخیر کا شکار ہو گئی، اسپیس ایکس نے سنیتا ولیمز اور بوچ ولمور کو واپس لانے والا مشن ملتوی کر دیا۔
اسپیس ایکس نے فالکن 9 راکٹ کے لانچ کو اس وقت ملتوی کر دیا جب محض 1 گھنٹہ باقی تھا۔ 
یہ راکٹ ان 4 خلاء بازوں کو لے جا رہا تھا جو بین الاقوامی خلائی اسٹیشن (آئی ایس ایس) پر موجود ناسا کے پھنسے ہوئے خلاء باز سنیتا ولیمز اور بوچ ولمور کی جگہ لینے والے تھے۔
ناسا اور اسپیس ایکس کے مطابق کریو-10 مشن کی روانگی ایک تکنیکی خرابی کے باعث منسوخ کر دی گئی۔
خلاء میں پھنسے خلاء بازوں نے غیر متوقع طویل سفر کا احوال سنا دیا
 ناسا کے کینیڈی اسپیس سینٹر کے لانچ کمپلیکس 39A پر فالکن 9 راکٹ کے گراؤنڈ سپورٹ کلیمپ آرم کے ہائیڈرولک سسٹم میں مسئلہ پیدا ہو گیا تھا، جس کی وجہ سے راکٹ کو اڑانے کا منصوبہ ترک کرنا پڑا۔
لانچ کی منسوخی کے بعد ناسا کے خلاء باز این مک کلین اور نیکول ایئرز، جاپانی اسپیس ایجنسی (JAXA) کے خلاء باز تاکویا اونیشی اور روسی خلاء باز کیریل پسکوف کو ڈریگن اسپیس کرافٹ سے بحفاظت نکال لیا گیا۔
اگر سب کچھ منصوبے کے مطابق چلتا تو اسپیس ایکس کا کریو ڈریگن مشن 19 مارچ تک سنیتا ولیمز اور بوچ ولمور کو بحفاظت زمین پر واپس لے آتا۔
ناسا اور اسپیس ایکس کی ٹیمیں اس تکنیکی مسئلے کو حل کرنے میں مصروف ہیں اور جلد ہی ایک نیا لانچ شیڈول جاری کیا جائے گا۔