چنڈی گڑھ، 13 مارچ (یو این آئی) پنجاب کے وزیر اعلی بھگونت سنگھ مان نے ہندوستان میں متحدہ عرب امارات (یو اے ای) کے سفیر ڈاکٹر عبدالناصر جمال الشالی کے ساتھ ایک اہم میٹنگ کی جس میں پنجاب اور یو اے ای کے درمیان دو طرفہ تجارت، سرمایہ کاری اور ثقافتی تبادلے کو مضبوط بنانے کے مواقع پر تبادلہ خیال کیا۔
میٹنگ کے دوران مسٹر مان نے ریاست کو مواقع کی سرزمین کے طور پر پیش کیا۔  اس کی مضبوط زرعی بنیاد، صنعتی صلاحیت اور تیزی سے بڑھتے ہوئے کاروباری ماحولیاتی نظام کو اجاگر کیا۔ انہوں نے زور دے کر کہا کہ پنجاب اور متحدہ عرب امارات کے درمیان تجارت اور  کاروبار  میں قدرتی ہم آہنگی ہے جس سے باہمی فائدے کے لیے استفادہ کیا  جا سکتا ہے۔
خوراک کی پیداوار، ڈیری اور ایگرو پروسیسنگ میں ریاست کی مضبوط پوزیشن کی طرف اشارہ کرتے ہوئے انہوں نے کہا کہ پنجاب متحدہ عرب امارات کی غذائی تحفظ کی ضروریات کو پورا کرنے میں کلیدی کردار ادا کر سکتا ہے۔ انہوں نے آئی ٹی، لاجسٹکس، صحت کی دیکھ بھال اور تعلیم میں تعاون کے امکانات کو بھی اجاگر کیا جو دونوں خطوں کے لیے نئے اقتصادی مواقع پیدا کر سکتے ہیں۔ مستقبل میں تعاون کو منظم سمت فراہم کرنے کے لیے  انہوں نے ایک مشترکہ ورکنگ گروپ ( جے ڈبلیو جی ) قائم کرنے کی تجویز پیش کی جو باہمی دلچسپی کے ممکنہ شعبوں کا جائزہ لے اور اس کی تلاش کرے اور تجارت اور سرمایہ کاری کو بڑھانے کے لیے حکمت عملی بنائے۔
بات چیت کے دوران پنجاب اور متحدہ عرب امارات کے شہروں کے درمیان براہ راست فضائی رابطے کی ضرورت کا معاملہ بھی اٹھایا گیا۔ متحدہ عرب امارات کے سفیر نے تجارت، سرمایہ کاری اور سیاحت کو آسان بنانے کے لیے امرتسر اور چندی گڑھ (موہالی) ہوائی اڈوں سے متحدہ عرب امارات کے لیے اضافی براہ راست پروازوں کی اہمیت پر زور دیا۔ اس پر ردعمل ظاہر کرتے ہوئے وزیر اعلیٰ نے یقین دلایا کہ وہ آنے والے دنوں میں مرکزی شہری ہوابازی کے وزیر کے ساتھ  اس معاملے کو  اٹھائیں گے اور متحدہ عرب امارات کی ایئر لائنز کے ذریعے براہ راست پرواز کے لیے منظوری حاصل کریں گے۔ انہوں نے کہا کہ بہتر رابطے سے تجارت، سیاحت کو فروغ ملے گا اور ریاست میں ہزاروں تارکین وطن، تاجروں اور پیشہ ور افراد کے لیے سفر میں سہولت ہوگی۔
وزیر اعلیٰ نے کہا کہ بہتر ہوائی رابطہ نہ صرف اقتصادی تعلقات کو مضبوط کرے گا بلکہ ان مسافروں کو درپیش لاجسٹک چیلنجوں کو بھی کم کرے گا جنہیں فی الحال متحدہ عرب امارات جانے والی پروازوں کے لیے دہلی جانا پڑتا ہے۔ انہوں نے امید ظاہر کی کہ اس مسئلے کے حل سے پنجاب اور متحدہ عرب امارات کے درمیان مزید اقتصادی امکانات کھلیں گے۔
 ملاقات میں طویل  مدتی تجارت اور سرمایہ کاری کی  ساجھیداری پر توجہ مرکوز کی گئی۔