دہلی میں غازی پور میں کوڑے کے پہاڑ کو کم کرنے کے تمام دعوؤں کے درمیان نیشنل گرین ٹریبیونل کے ذریعہ تعینات کورٹ کمشنر اور وکیل کاتیاینی کی تازہ رپورٹ آ گئی ہے۔ اس میں کئی حیران کرنے والی باتیں سامنے آئی ہیں۔ غازی پور میں لینڈ فِل کی اونچائی 40 میٹر سے بڑھ کر 60 میٹر ہو جانے سے آلودگی کا خطرہ بڑھ گیا ہے۔

رپورٹ کے مطابق غازی پور میں کوڑے کے پہاڑ کی مقررہ حد 40 میٹر تھی جو اب بڑھ کر 60 میٹر ہو گئی ہے۔ وہیں دوسری طرف وہاں پر کوڑا ہٹانے کی حالت بدتر ہو گئی ہے۔ رپورٹ کے مطابق لینڈ فِل سائٹ پر میتھین وینٹ لگائے گئے ہیں لیکن میتھین کو اکٹھا کرنے کا کوئی انتظام نہیں ہے۔ رپورٹ پر غور کرنے کے بعد این جی ٹی نے تسلیم کیا ہے کہ دہلی میونسپل کارپوریشن نے سالڈ ویسٹ مینجمنٹ ضابطوں کی خلاف ورزی کی ہے۔
رپورٹ کے ذریعہ سامنے آئے سنگین حالات اور شواہد کو دیکھتے ہوئے این جی ٹی کے چیئرمین جسٹس پرکاش شریواستو کی بنچ نے ایم سی ڈی کو کوڑا ہٹانے کے سلسلے میں مقررہ وقت منصوبہ پیش کرنے کی ہدایت دی ہے۔
این جی ٹی نے یہ بھی ہدایت دی ہے کہ سالڈ ویسٹ ضابطوں کے تحت اجازت سے زیادہ کوڑا جمع نہ کیا جائے۔ صحت سے متعلق خطرے، تحفظ اور بار بار آگ لگنے کے واقعات کی روک تھام یقینی کرنے کے لیے مناسب بایو مائننگ اور مینجمنٹ منصوبہ کو عمل میں لایا جائے۔
ویسے کوڑا پروسیس کرنے کے لیے ابھی تک ایم سی ڈی نے کئی بڑے منصوبے شروع کیے ہیں۔ ان میں ایم سی ڈی کا سب سے بڑا منصوبہ ویسٹ ٹو انرجی پلانٹ شامل ہے۔ الگ الگ جگہوں پر لگائے گئے ویسٹ ٹو انرجی پلانٹوں پر ہی ایم سی ڈی ہر دن 8000 ٹن کے قریب کوڑا ٹھکانے لگا رہی ہے۔ ان پلانٹوں پر کوڑا کو جلا کر بجلی تیار کی جاتی ہے۔ ویسٹ ٹو انرجی پلانٹ پی پی پی ماڈل پر لگائے گئے ہیں۔